វាយតម្លៃខ្ពស់លើទំនាក់ទំនងប្រវត្តិសាស្ត្រ ៧០ឆ្នាំ
ក្នុងជំនួបប្រកបដោយបរិយាកាសស្និទ្ធស្នាលនោះ ថ្នាក់ដឹកនាំទាំងពីរបានសម្តែងការអបអរសាទរចំពោះវឌ្ឍនភាពនៃទំនាក់ទំនងទ្វេភាគី៖
. ឯកឧត្តម Vladimir Putin បានគូសបញ្ជាក់ថា កម្ពុជាគឺជាមិត្ត និងជាដៃគូយូរអង្វែង។ ក្នុងឱកាសខួបលើកទី៧០ នៃការបង្កើតទំនាក់ទំនងការទូតរុស្ស៊ី-កម្ពុជា ឯកឧត្តមបានស្វាគមន៍ចំពោះសកម្មភាពរួមនានាដើម្បីអបអរសាទរព្រឹត្តិការណ៍ប្រវត្តិសាស្ត្រនេះ និងបានសង្កត់ធ្ងន់ថា រុស្ស៊ីនៅតែផ្តល់អាទិភាពខ្ពស់លើការបន្តអភិវឌ្ឍកិច្ចសហប្រតិបត្តិការជាមួយកម្ពុជា។
. សម្តេចធិបតី ហ៊ុន ម៉ាណែត បានថ្លែងថា ក្នុងរយៈពេល ៧ទសវត្សរ៍កន្លងមកនេះ កម្ពុជាតែងផ្តល់តម្លៃខ្ពស់ដល់មិត្តភាពជាប្រពៃណី និងកិច្ចសហប្រតិបត្តិការយូរអង្វែងជាមួយរុស្ស៊ី ដែលផ្អែកលើការជឿទុកចិត្តខាងនយោបាយ ការគាំទ្រ និងការគោរពគ្នាទៅវិញទៅមក ព្រមទាំងផលប្រយោជន៍រួម។
ការដឹងគុណចំពោះការគាំទ្រ៖ សម្តេចធិបតី បានថ្លែងអំណរគុណយ៉ាងជ្រាលជ្រៅចំពោះអតីតសហភាពសូវៀត ដែលបានផ្តល់ជំនួយ និងការគាំទ្រដល់កម្ពុជាក្នុងគ្រាលំបាក ក៏ដូចជាសហព័ន្ធរុស្ស៊ី ដែលបានបន្តរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជារហូតមកដល់បច្ចុប្បន្ន។ សម្តេចក៏បានបង្ហាញការប្តេជ្ញាចិត្តក្នុងការបន្តពង្រឹង និងពង្រីកកិច្ចសហប្រតិបត្តិការលើគ្រប់វិស័យឱ្យកាន់តែស៊ីជម្រៅបន្ថែមទៀត។
ទិសដៅកិច្ចសហប្រតិបត្តិការទៅថ្ងៃអនាគត
ថ្នាក់ដឹកនាំទាំងពីរបានពិភាក្សា និងដាក់ចេញនូវគំនិតផ្តួចផ្តើមសំខាន់ៗ ដើម្បីពង្រីកទំនាក់ទំនងលើវិស័យយុទ្ធសាស្ត្រ រួមមាន៖
. វិស័យស្នូល៖ នយោបាយ, ពាណិជ្ជកម្ម និងការវិនិយោគ, ថាមពល, កសិកម្ម, សន្តិសុខ និងការពារជាតិ។
. ការតភ្ជាប់រវាងប្រជាជន និងប្រជាជន៖ ផ្ដោតលើការអប់រំ និងបណ្តុះបណ្តាល, សុខាភិបាល, ទេសចរណ៍ និងវប្បធម៌។
. យន្តការការទូត៖ បន្តជំរុញការផ្លាស់ប្តូរទស្សនកិច្ច និងការប្រាស្រ័យទាក់ទងកម្រិតខ្ពស់ ទាំងក្នុងក្របខ័ណ្ឌនីតិប្បញ្ញត្តិ (សភា) នីតិប្រតិបត្តិ (រដ្ឋាភិបាល) និងគណបក្ស។
ជាពិសេស ក្នុងឱកាសនោះដែរ សម្តេចធិបតី ហ៊ុន ម៉ាណែត ក៏បានស្នើឱ្យឯកឧត្តមប្រធានាធិបតីរុស្ស៊ី ជួយគាំទ្រដល់សំណើរបស់កម្ពុជា ក្នុងការបង្កើតកិច្ចព្រមព្រៀងពាណិជ្ជកម្មសេរី (FTA) រវាងកម្ពុជា និងសហភាពសេដ្ឋកិច្ចអឺរ៉ាស៊ី (EAEU) ផងដែរ។
ប្រភព: ក្រសួងព័ត៌មាន
