កាលពីឆ្នាំ១៩៦៦ សុនខ២ក្បាល ត្រូវបានបញ្ជូនឡើងទីអវកាស ដើម្បីបំបែកកំណត់ត្រា

បរទេស៖ កាលពីថ្ងៃទី ២២ ខែកុម្ភៈ ឆ្នាំ ១៩៦៦ សុនខ ២ ក្បាលរបស់សហភាពសូវៀត ត្រូវបានបាញ់បញ្ជូនទៅទីអវកាស នៅក្នុងបេសកកម្មមួយ ដើម្បីបំបែកកំណត់ត្រានៃការហោះហើរក្នុងទីអវកាស បានរយៈពេលយូរបំផុត។

ជាលទ្ធផល សុនខទាំងពីរក្បាលដែលមានឈ្មោះថា Veterok និង Ugolyok ឬជាភាសាអង់គ្លេសហៅថា Light Breeze និង Coal បានចំណាយពេល ២២ ថ្ងៃជិះនៅលើយានគោចរជុំវិញភពផែនដី។ កំណត់ត្រានេះ មិនអាចមាននរណាបំបែកបានឡើយ រហូតដល់បេសកកម្មរបស់មនុស្ស បានប្រព្រឹត្តទៅកាលពីឆ្នាំ ១៩៧១ ហើយក៏គ្មានសុនខណាផ្សេងទៀត ត្រូវបានបញ្ជូនឲ្យបំបែកកំណត់ត្រានេះឡើយ។

គួរបញ្ជាក់ផងដែរថា ក្រោយការចុះមកដល់ភពផែនដីវិញ ទាំង Veterok និង Ugolyok សុទ្ធតែមានសុខភាពល្អ។ ការធ្វើតេស្តហោះហើរនៅទីអវកាសរបស់ Veterok និង Ugolyok រៀបចំឡើងដោយអតីតសហភាពសូវៀត ត្រូវបានទទួលស្គាល់ជាលក្ខណៈអន្តរជាតិថា បានត្រួសត្រាយផ្លូវយ៉ាងធំធេង សម្រាប់បេសកកម្មមនុស្សនៅទីអវកាស៕

ប្រភព៖ Cambo Space