ខាត់ សុខគីម

ភ្នំពេញ÷ បងប្អូនដែលធ្លាប់បានទស្សនារឿងភាគខ្មែរ ទេពធីតាព្កុលមាស និង ស្ត្រីពិត ម្ដាយពិត ឪពុកពិត ដែលធ្លាប់បានចាក់ផ្សាយនៅលើកញ្ចក់ទូរទស្សន៍ CTN កន្លងមកប្រាកដជាស្គាល់តួអង្គស្រីព្កុលមាស សម្ដែងដោយតារាស្រីជំនាន់ក្រោយ អឿន រ៉ូហ្សា មិនខាន។ ជាមួយនឹងទេពកោសល្យក្នុងការសំដែងនេះហើយ បានធ្វើឲ្យតារាស្រីវ័យក្មេងរូបនេះ ទទួលបានការចាប់អារម្មណ៍ពីសំណាក់អ្នកគាំទ្រយ៉ាងច្រើន។

ប្រជាប្រិយភាពរបស់ អឿន រ៉ូហ្សា បាននាំនាងឲ្យទទួលបានទីផ្សារក្នុងសិល្បៈច្រើនមិនថាការសម្ដែង រឿងថតផ្សព្វផ្សាយផលិតផលឡើយ ពេលនេះនាងកំពុងមមាញឹកក្នុងការងារសិល្បៈគួរសម រីឯសម្រស់ក៏កាន់តែស្រស់ស្អាតផងដែរ។ ក្រៅពីការសម្ដែងហើយ រ៉ូហ្សា ក៏ធ្លាប់ទទួលបទពិសោធន៍ធ្វើជាពិធីការិនីក្នុងកម្មវិធី Spotlight With Sana ដែលមានរៀមច្បងជើងចាស់អ្នកនាង ខៀវ សានសាណា ចាំជួយបង្ហាត់បង្ហាញផងដែរ៕