បុរសម្នាក់ត្រូវបានសត្វក្រពើខាំ ជាច្រើនកន្លែងបណ្តាលអោយរងរបួសយ៉ាងដំណំ

ខេត្តសៀមរាប៖ តាមសេចក្តីរាយការណ៍បានអោយដឹងថា បុរសម្នាក់ត្រូវសត្វក្រពើខាំជាច្រើនកន្លែងបណ្តាលអោយរងរបួសធ្ងន់ធ្ងរ ហើយកំពុងត្រូវបានដឹកយកទៅសង្គ្រោះបន្ទាន់នៅឯមន្ទីរពេទ្យរាជធានីភ្នំពេញខណះបុរសម្នាក់នេះធ្លាក់ចូលអាងក្រពើ។ ហេតុការណ៍នេះកើតឡើងនៅវេលានៅចន្លោះម៉ោង១យប់រំលងអធ្រាតឆ្លងចូលថ្ងៃច័ន្ទទី១៨ ខែ មេសា ឆ្នាំ២០២២ ចំណុចទ្រុងក្រពើស្ថិតនៅ ភូមិកំពង់តាយ៉ង ឃុំពួក ស្រុកពួក ខេត្តសៀមរាប ។ សមត្ថកិច្ចបានអោយដឹងថាជនរងគ្រោះ មានឈ្មោះ ស៊ូ សុធា ភេទប្រុស អាយុ៣៧ឆ្នាំ រស់នៅ ភូមិ/ឃុំកើតហេតុខាងលើ មុខរបរមន្ត្រីរដ្ឋបាលសាលាស្រុកពួក ។

តាមប្រភពព័ត៌មានពីក្រុមគ្រួសារជនរងគ្រោះបានឲ្យដឹងថា ជារៀងរាល់ថ្ងៃជនរងគ្រោះ(ស៊ូ សុធា)គឺជាអ្នកមើលថែលើការចិញ្ចឹមសត្វក្រពើហើយតែងតែដេកអង្រឹងលើរោងទ្រុងក្រពើតែម្នាក់ឯង ។ លុះនៅល្ងាចថ្ងៃទី១៧ ខែមេសា ឆ្នាំ២០២២ ជនរងគ្រោះនិងក្រុមគ្រួសារជួបជុំផឹកស៊ីជុំគ្នាអស់ស្រាបៀរប្រមាណ១កេះ (២៤កំប៉ុង) ហើយក៍បែកគ្នារៀងៗខ្លួន។ រីឯជនរងគ្រោះបានឡើងទៅដេកនៅរោងលើទ្រុងក្រពើ លុះនៅម៉ោងចន្លោះ០១.០០នាទីយប់ គេលឺសំលេងស្រែកដល់ផ្អើលអ្នកផ្ទះជិតខាងនិងអ្នកក្នុងផ្ទះ ខណះនោះនាំគ្នាក្រោកទៅមើលចំណុចកើត ហេតុ(រោងដេកលើទ្រុងក្រពើ)ខណះនោះបានឃើញជនរងគ្រោះធ្លាក់ចូលក្នុងអាងទឹកក្រពើ ត្រូវបានសត្វក្រពើខាំបោកទាញ ហើយពួកគេនាំគ្នាយកឈើជួយវាយសង្គ្រោះយកជនរងគ្រោះបាន និងដឹកទៅមន្ទីរពេទ្យភ្លាមៗ។

យោងតាមសមត្ថកិច្ចដែលចុះពិនិត្យកន្លែងកើតហេតុ ឃើញថាទ្រុងចិញ្ចើមសត្វក្រពើមានច្រើនអាងជាប់គ្នា ។ ដោយឡែកទ្រុងជនរងគ្រោះដែលធ្លាក់ចូល គឺទ្រុងទំហំ១០ម៉ែត្រ×១២ម៉ែត្រ អាងទឹកទំហំ ៧ម៉ែត្រ × ៨ម៉ែត្រ ក្នុងនោះមានសត្វក្រពើប្រភេទ មេពូជ និងក្រពើឈ្មោល ចំនួនជាង ២០ក្បាល (ធំៗ)។ តាមការសន្និដ្ឋាន ជនរងគ្រោះអាចក្រោកទៅនោមរអិលជើងធ្លាក់ចូលក្នុងអាងសត្វក្រពើ ។ ទោះជាយ៉ាងណាក៍ដោយពលរដ្ឋសូមសំណូមពរអោយមានការប្រុងប្រយ័ត្នទាំងអស់គ្នាព្រោះសត្វក្រពើមិនស្គាល់ម្ចាស់ទេ ។

ប្រភព÷ CHN Channel News